Azərbaycanda dəniz neft sənayesinə xidmət göstərən dalğıc işləri xidməti 1949-cu ildə Xəzər dənizində neftin kəşf olunmasından sonra başlanmışdır. 1975-ci ilə qədər dalğıc və qəza-xilasetmə işləri hər bir Neft və Qaz Çıxarma İdarəsinin (NQÇİ) tabeliyində olan dalğıc və qəza-xilasetmə xidmətləri tərəfindən yerinə yetirilirdi. 1975-ci ilin dekabr ayında bütün bu xidmətlər “Xəzərdənizneftqazdonanma” idarəsinin tərkibində bir idarə - Sualtı Texniki İşlər və Dənizin Çirklənmədən Qorunması Üzrə İxtisaslaşmış İdarəsı adı altında birləşdilər. 1992-ci ildən bu idarə Xəzər Dəniz Dalğıc və Qəza-Xilasetmə İşləri İdarəsi adlanaraq Dənizdə Neft və Qaz Çıxarma İstehsalat Birliyinin (sonradan “Azneft” İB-nin) tərkibində fəaliyyət göstərmişdir. ARDNŞ-də aparılan struktur dəyişiklikləri ilə əlaqədar olaraq, Xəzər Dəniz Dalğıc və Qəza-Xilasetmə İşləri İdarəsi 2007-ci ilin aprel ayından etibarən yenidən təşkil edilmiş və hazırda Xəzər Dəniz Neft Donanmasının struktur bölməsi olaraq, Dalğıc və Qəza-xilasetmə İşləri İdarəsi  kimi fəaliyyət göstərir.

 

Dalğıc xidmətləri üzrə əsas fəaliyyat növləri aşağıdakılardır:

 

• Hava dalğıc işlərinin yerinə yetirilməsi. Sualtı-texniki və dalğıc işlərinin yerinə yetirilməsi MDK-60 hava dalğıc sistemi, “Orion”, “Zərdab”, “Urunos” tipli həmçinin dalğıc gəmiləri həmçinin, “Geofizik” və “Avior” hava-dalğıc kompleksli dalğıc gəmiləri vasitəsi ilə yerinə yetirilir.
• Saturasiya üsullu dalğıc işlərinin yerinə yetirilməsi. 200 metrə qədər saturasiya dalğıc işləri d/e “Əli Əmirov” gəmisində yerləşdirilmiş Dərinlik Dalğıc Kompleksi vasitəsi ilə yerinə yetirilir.
• Heyətsiz Sualtı Aparatlarla (HSA) sualtı-texniki işlərinin yerinə yetirilməsi. HSA təminatı işləri göyərtəsində 2 ədəd inspeksiya tipli “Seahawk” və 1 ədəd işçi tipli “Skorpio” HSA avadnlıqları yerləşdirilmiş “Təbriz Xəlilbəyli” gəmisi vasitəsi ilə yerinə yetirilir.
• Qəza-xilasetmə xidməti təmini. Bu xidmət dəniz estakadalarında, dərinlik dəniz özüllərində və gəmilərin yan alma körpülərində yerləşən xilasetmə postlarında çalışan xilasedici-matroslar tərəfindən yerinə yetirilir.